يا ماما انا ماليش دعوة انا عايز اتجوز تفيدة
واللهى لو ماجوزتونى تفيدة هاموت نفسى
وهابعت جواب لامن الدولة وهاقولهم انكم من عناصر القاعدة
يا ابنى يا حبيبى انت شفتها كويس دة شكلها وحش قوى وكمان حولة وشعرها اكرت
و انتوا مالكم هو انتوا اللى هتتجوزوها انا اللى هاعيش معاها
طب فكر يا ابنى عندك بنت خالك" زلجبار"زى القمر وبنت ناس نعرفها فكر يا ابنى وربنا يهديك
وسابتنى امى اسبوع افكر
وقعدت افكر فعلا ان تفيدة فعلا وحشة وانا شايفها وحشة بس هاعمل اية ما هية اللى قدامى ما انا معرفتش غيرها
هو انا بحبها فعلا ولا هية المساءلة رحلة والواحد ماشيها وبيقابل ناس كتير فيها بيبحب واحدة منهم لكن لو اتغيرت رحلتة هيقابل ناس غير الناس و فى الحالة دة هيحب واحدة تانية خالص، يعنى اية..... يعنى مساءلة انى اموت فيها دة ومقدرش اعيش من غيرها دة مساءلة اونطة ولا اية
ثم حتى لو الموضوع كدة انا بردة بحب تفيدة ،وقررت اقول لماما انى مش هاتجوز غير تفيدة
ماما طبعا زعلت منى وقالت لى روح اخطبها لوحدك
وبالفعل روحت واتشيكت وروحت اقابل ابو تفيدة
وانا قاعد مع عمى
اذ اية بقى
اذ حماتى دخلت علينا وماسكة شعرها وبتصوت قال اية
تفيدة ولعت ،تفيدة ولعت، تفيدة ولعت، تفيدة ولعت، تفيدة ولعت
قال نار البوتجاز مسك فى شعرها بعد ماحطت فية جازعشان ينعم
والغريبة ان فى عز ما هما دخلوا كلهم يطفوا تفيدة
انا كنت بفكر فى "زلجبار" بنت خالتى وانها فعلا احلى من تفيدة بكتير
وازاى اصالح ماما عشان تروح تخطبهالى
15 comments:
ساخر كعادتك في الكتابة لكنك ترسم البسمة على شفاة من يقرأ لك وتجعلة يتقبل ما تتضمنه سطورة أبو على الجميل تحياتي وخلي بالك مش تطلع من تفيدة تقع في زلجبار هههههههه، تحياتي
زوقك اتطور في اختيار بنت الحلال صح يقولون ان مراية الحب عمياء ولكني اقول لك انها ليست كذلك و لكن الانسان متي صادف الحب فانه يشعر بحبيبه برويته بميزان قلبه بصفات يحددها بداخله ومتي يصادفهافقد حقق معادلة الحب ، الشكل و اللون و اي شىء اخر لا يمثل له شىء في هذه الحالة لذلك تفيدة او حتي كبلات كفتة مش هتفرق لان قلبه وجد ما يريده
وهو يجعله يري حبيبه اجمل ما في الوجود و اجمل انسان بروحه اولا و سبحان الله ربنا بيزنه له في اجمل شكل
ربنا معاك و عقبال ما تجد ما تتمناها و من تستحق قلبك الجميل
همسه حب
بالسهولة دي المشاعر ممكن تتغير
ببساطة كده
هما دول الرجال لكن لو كان هوه اللي ولع كانت الشهامه خدت تفيدة وقعدت جنبه تمرضه وتغيرله الشاش
يلا قدر
هو انا بحبها فعلا ولا هية المساءلة رحلة والواحد ماشيها وبيقابل ناس كتير فيها .....حسن مش قادرة اقولك قد ايه وقعت قلبي من الضحك وانا بشوف تفيدة واللي حصلها سامحني بجد ،، لكن بعد اسقاطاتك خفيفة الظل دايما بتوصلنا لحقيقة والمرة احب اكد لك انك حبتها فعلا وان الحب واقع وتكرارة واقع معاك حق
واسمحيلي يا نهى برغم ان تفيدة صعبت على قوي عشان سابها لما ولعت بعد كل الغرام ده بس أءكدلك ان لو هو اللي ولع تفيدة برضة مش بالضرورة كانت هتمرضة ولا تستنى جنبه ممكن كمان تطلع ندلة وتسيبه
ليس كل الرجال ولا كل النساء
تحياتي ليك يا ابو علي والف سلامة على تفيدة ومبرك عليك زلجبار بس على الله تصدق
تحياتى للجميع
سيد
همسة
نهى
نورسين
اود ان اعبر لكم عن جزيل شكرى لتعليقاتكم الرائعة على مدونتى البسيطة
لكن احب ان اوضح ان كل ماهدفتة من هذة الحدوتة
ان الحب نفسة حدوتة يمكن ان يتغير بتغير الظروف والمواقع
فانا لو عشت فى بيت فى بولاق هاعيش واحب وهابقى اموت فى اللى بحبها
لكن لو عشت فى قصر هاحب وهاموت فى واحدة تانية خالص غير الاولانية
اة ممكن اكون بدور على نفس الصفات لكن الاكيد ان طبيعتهم بردة هتبقى مختلفة
يعنى من الاخر مفيش حد بيقف على واحدة او واحد ولا الحياة تتوقف عندهم ايضا
تحياتى
برافو عليك الحياة كدة هتمر و كدة هتمر ياست حزنت غدرت او اتغدر بيك فارقت اوالتقيت بمن يحبوك ، كان ثوبك هو البراءة او كان العصيان و الغرور فالحياةلا تتوقف عند احد او في محطة واحدة كلة بيعدي
صبرك وياسك في ايدك وانت حر
تايس ما تياس الحياة راح تمر
انا دقت مندة ودي عجبي لقيت
الصبر مر و الياس بردو مر
عجبي ......عجبي علي الحياة و سرها بس اللي يفهمه هيستريح
همسه
يعني يوم ما تفيدة قالت تحلو شوية ولعت في نفسها؟؟ علشان يبقي يعجبك لو كنت بتحبها حب حقيقي كنت فضلت معاها علشان انت اخترتها من الأول لكن هي ذنبها اية في شكلهالو كنت مكانها كنت هتعمل اية لما حبيبتك تسيبك علشان شكللك
القلب الأبيض اللي دايما بيدي وعمرة مايستني ياخد صعب انك تلاقية في الزمن دة وقليل اوي ماتلاقية في شكل حلو
يعني يوم ما تفيدة قالت تحلو شوية علشان تعجبك تخسر كل حاجة تولع في نفسها وكمان انت تسيبها دة كتير عليها لأن هي ملهاش ذنب في شكلها بس نعمل اية الدنيا دي دنية مظاهر ميهماش الأنسان عامل اية من جوة. لكن انت محبتهاش لو حبيتها كنت هتضل معاهاو هتحدي الدنيا كلها بيها
لكن قولي كنت هتعمل اية لو حبيبتك سابتك علشان شكللك.
عايزة اقوللك ان بجد كتاباتك حلوة اوي وياريت تفضل تكتب علي طول وعندك حاجات كتير ممكن تكتب فيها في الزمن دة
بص
ومن غير مجاملة
أنا صعب جدا أضحك في رمضان.. بس أعمل إيه بقى ضحكت.. اسنمر.. ولو عليت شوية هاتكتب للمسرح الكوميدي على طول.. صبا ح الابتسامة
وهاأولع فيك المرة الجاية.. طبعا انت كده فاهم مين اللي ولع في تفيده!!
:-)
تحياتي وحبي
ابو علي اية اوعى تقولي لسة زعلان على تفيدة علشان اتحرقت
بقالك كتير مكتبتش يا حسن يا ريت اقرأ ليك حاجة قريب
رائعععععععععععععععععع
استمر
حسن صباح الخير دة عنوان البلوجر بتاعي يسعدني زيارتك جدا
http://rehamanter.blogspot.com/
البوب زيزو
لو قلت لك كلماتك سعدتنى اد اية مش هتبطل تتكلم عنى كويس على الاقل عشان تكسب ثواب فيا.
------------------------------
توتى : واللهى انا مقصدش الشكل انا اقصد المضمون انا بحاول اغلف موضوع جوة قصة هتوصل اسرع واحسن وانا وضحت مضمونى فى التعليق السابق
مرسى لزيارتك ويا رب متقطعش رجلك من عندى
----------------------------------
واللهى يا ابو السيك هتشوف حاجة قريب
------------------------------
العزيزة همسة سعدنى دخولك دائما على افتكاساتى
وسعدت اكثر عندما رايت لك مدونتك الخاصة
تعليفاتى هتنزل عليكى ترف
بس متزهقيش
تحياتى
أبو على ياجامد أوى كنت مخبى كل ده فين بالتوفيق ويارب للأحسن
أم عمر
Post a Comment